(Update) CAGAYAN DE ORO CITY – Mi-sentro sa personal o may kalabutan sa iyang trabaho kon nganong gipapusil-patay ang radio broadcaster nga si Juan Jumalon o Johnny Walker sa mismong sulod sa iyang FM station nga gipanag-iya sa Purok 2,Brgy Bernardo Neri,Calamba,Misamis Occidental.
Kini ang inisya nga nakuha nga mga impormasyon ni Misamis Occidental Provincial Police Director Col. Dwight Monato kinsa nangulo sa gitukod nga Special Investigaion Task Group Johnny Walker kabahin sa hitabo.
Siya miingon nga pabiling gisuta nila ang koneksyon kabahin sa iyang trabaho apan gihatagan usab nila’g gimbug-aton ang kasamtangang kaso nga gipasaka sa pamilya batok sa pipila ka personalidad kabahin sa yuta sa korte sa ilang lugar.
Una niini,naglugwa na’g composite cartographic sketch ang SITG ngadto sa usa sa tulo ka suspek nga mipusil-patay sa biktima sa miaging adlaw’ng Domingo sa buntag.
Samtang kumbinsido ang pamilya sa magsisibya nga dili tungod sa iyang trabaho kon nganong gipusil-patay kini samtang kamulo nga programa.
Miingon ang kapikas nga si Cherebel Jumalon nga dili ‘hard hitting commentator’ ang iyang bana apan simple lang nga magsisibya sa ilang lugar.
Dili usab kumbinsio si Gng Jumalon nga may kalabutan sa politika o kalambigitan sa laing relasyon sa babaye kon nganong gipapatay ang iyang kapikas.
Apan bug-at ang iyang pagtoo nga gipapusil ang biktima tungod sa ilang gamay’ng negosyo ug ang padayong away-legal kabahin sa yuta nga gipuy-an nila diin kasamtangang gidungog sa korte.
Luyo niini,nangayo’g hustisya ang pamilyang Jumalon kabahin sa hitabo.
Dugtong niini,gihagit sa Cagayan de Oro Press Club o COPC ang kapolisan nga dili magsilbing ‘cold case’ ang laing pagpatay sa sakop sa media nga nakabase didto sa Calamba,Misamis Occidental.
Kini ang mensahe ni COPC Pres. Frank Mendez dungan sa pagkondenar batok sa utok nga misugo sa tulo ka suspek aron sudlon ug pusilon-patay sa sibyahan si Johnny Walker sa maong lugar ning semanaha lamang.
Miingon si Mendez nga unta mapadali ang pagtumbok sa tinud-anay nga misugo sa kremin aron mahatagan sa hustisya ang pamilya sa biktima.
Kini ang ikaduhang kaso nga dunay sakop sa media nga gipusil-patay sulod sa announcer’s booth diin ang una natigayon sa Iligan City sa dugay nang panahon.
Sa pikas bahin,uyon-dili si KBP Misamis Oriental-CdeO chapter Pres. Ronald Rufin nga armasan ang mga sakop sa media aron dunay ikadepensa kon may mga higayon nga mabutang sa alanganin ang ilang seguridad dinhi sa syudad ug lalawigan.
Miingon si Rufin nga angayang sundon lang sa mga sakop sa KBP ang gabayan sa organisasyon aron kalikayan ang mga hitabo sama sa ubang sakop sa media nga nahunusan sa kinabuhi.
Apan siya miingon nga dili gihapon makiangayon nga basta-basta na lang patyon ang sakop sa media ilabina kon naghimo kini sa iyang trababo ubos sa katarong batok sa mga personalidad nga nakahimo’g kasupakan sa balaod sa nasud.
Alayon niini,gipasalig ni PRO 10 Director Brig Gen Ricardo Layug Jr nga prioridad sa iyang liderato ang seguridad sa mga sakop sa media dinhi sa rehiyon.
Kini ang gipalanog nga mensahe ni PRO 10 spokesperson Maj Joann Navarro tungod sa kahingawa nga gibati sa mga sakop sa media sa laing sakop sa industriya nga basta-bastang gipatay didto sa Misamis Occidental.
Miingon si Navarro nga naka-schedule na usab si Layug nga mohimo’g radio station visits agi’g pagpakita kon unsa niini ka prioridad ang mga sakop sa media ilabina dinhi sa syudad ug lalawigan.
