Nagmalinawon o generally peaceful ang pagselebrar sa Domingo sa lukay sa tibook Northern Mindanao. Kini ang gibutyag ni Police Regional Office (PRO) -10 Spokesperson Police Major Joann Navarro kalabot sa ilang assessment sa relihiyosong kalihukan kagahapon.
Miingon si Navarro nga daku ang tabang sa ilang police deployment ngadto sa mga kasimbahanan kung asa gipahigayon ang pagtamod sa unang adlaw sa Semana Santa alang sa Romano Katolikong pagtuo.
Ipadayon sa kapulisan ang security deployment sa mga dagkung pilgrimage sites alang sa mga katoliko nga mulusad sa ilang panaad, ug sa mga kasimbahanan nga mulusad sa ilang visita iglesia.
Miingon si Navarro nga gisugdan na nila ang ilang pag-inspection sa mga lugar nga sagad bisitahan sa katawhan ning Semana Santa kundiin, ang mipahigayon niini mao ang ilang mga regional command aron mahimong luwas ang pagpatuman sa Ligtas Holy week 2026.
