CAGAYAN DE ORO CITY- Nanganti ang pamilya ni Misamis Oriental 1st District Congressman elect Christian Unabia nga kasuhan ang provincial board secretary sa Sangguniang Panlalawigan nga si Atty Ernesto Sotto.
Kini human nasakitan ang pamilyang Unabia sa pasangil ni Sotto pinaagi sa mga mensahe niini nga gi-post sa Facebook nga nakadaug lamang sa piliay tungod sa paggamit sa salapi gikan sa ilegal nga droga.
Miingon si 1st district board member Virginia Dumadag nga kini ang hinungdan nga gipa-deklara nila nga ‘persona non grata’ si Sotoo sulod sa Sangguniang Panlalawigan sa ilang sesyon niadtong adlaw’ng Lunes.
Dugang ni Dumadag nga mismo siya ang emosyonal sa batikos ni Sotto batok sa katawhan sa Misamis Oriental rason gipasar ang resolusyon.
Samtang walay ngipon ang deklarasyong persona non grata nga gipahamtang batok Sotto gikan sa Sangguniang Panlalawigan sa Misamis Oriental.
Kini tungod kay protektado sa balaod sa civil service commission si Sotto apan mahimong mapaubos sa disciplinary action.
Kini ang kati-awan ni Citizens Watch for Good Governance convenor Atty Antonio Soriano sa nahitabo sa Sangguniang Panlalawigan.
Miingon si Soriano nga walay epekto sa trabaho ni Sotto ang maong deklarasyon apan angay usab nga limitahan niini ang pagka-partisan bisan nga ubos kini sa superbisyon sa buhatan sa kasamtangang Vice Gov Joey Pelaez.
