Maka-huluganon ang pagselebrar sa Pasko ning tuiga. Kini ang pahayag ni Father Der John Faborada, apostolate communication officer sa Archdiocese of Cagayan de Oro. Si Faborada miingon nga sa tuig 2025, daghang mga katalagman ang mibubo sa Pilipinas, sama kusog nga linog, kusog nga bagyo, pagbuto sa bulkan, ug mga man-made nga mga kalamidad sama sa paghungaw sa lapad nga corruption scandal sa Department of Public Works and Highways (DPWH) nga gikalambigitan sa mismong tag-as nga opisyales sa gobyerno. Miingon si Faborada nga gusto sa simbahan, ipabati sa katawhan ang paglaum taliwala sa daghang pagsulay, kundiin, ning tuiga, ubay-ubay ang nangamatay epekto sa walag tuo nga kalamidad ug naigo pa sa krisis sa kurapsyon ang nasud. Gibutyag sa kaparian nga ang liturhiya, musentro sa ebanghelo sa kapanganakan ni Hesu Kristo ug ang bili sa iyang pagkatawo sa kalibutan. Kining tanan hisgutan sa Simbang Gabi ug Misa de Gallo nga walay sagol pamulitika.
