CAGAYAN DE ORO CITY – Gisugyot sa grupong National Union of People’s Lawyers (NUPL) kang Presidente Ferdinand Marcos Jr nga mangita pa’g mga paagi nga makalikay ang Pilipinas sa nagkasungag nga interes sa mga heganting Estados Unidos ug China gamit ang West Philippine Sea issue.
Nabalaka ang grupo sa mga abogado nga mas maipit lang ug madehado ang interes sa Pilipinas kung magginamatay na sa modernong mga armas panggubat ang magkaribal nga Tsina ug Amerika sa mismong tugkaran niini.
Gibutyag sa Bombo Radyo ni NUPL President Atty. Ephraim Cortez nga maayo na ang nadag-an nga arbitral case ruling batok Tsina apan angayang makamugna sa dugang taktika ang national govt nga dili tanto magsalig sa mga saad nga tabang sa tropang Kano.
Pagpasabot niinii nga dili mahimong magsalig na lang ang Pilipinas sa mga saad ug walay buhaton nga kaugalingong diskarte kay nabalaka sila nga mo-ulbo ang dakong gubat sa West Philippine Sea.
Siya miingon nga midangop tuod ang Pilpinas sa daw mga kaalyhado batok sa naghinawod nga China apan dili matago ang managsama nila nga interes.
Dumduman nga sa daghang pangdaug-daug ug komprontasyon sa puwersang pandagat sa West Philippine Sea kontra Tsina,butong pagtaho ug pagdo-dokumento lang ang nahimo sa Pilipinas atubangan sa international community.
