CAGAYAN DE ORO CITY – Gitudlo ni Pres Bongbong Marcos isip bag-ong board member ang usa ka Cagay-anon sa Philippine National Oil Company Company/PNOC nga nakabase sa kauluhan.
Gikompirmar ni Palace Press Officer Atty. Claire Castro nga natudlo si Maria Shiela Cabaraban isip PNOC board of director member epektibo Hulyo 14 ning tuiga.
Gibutyag ni Castro nga sa wala pa matudlo sa bag-ong tahas si Cabaraban ubos sa Marcos administration, nagsilbi usab kining chairman sa Audit Commitee sugod Pebrero 16 hangtod Disyembre 31,2024.
Nagsilbi usab kining miembro sa Nomination and Remuneration Committee sa tuig 2023.
Gilayong nagpaabot sa mga pagtimbaya ang mga kabanay ni Cabaraban iyang mga higala ilabina ang mga naggikan dinhi sa syudad.
Si Cabaraban ang dunay termino sugod Hulyo 2025 hangtod Hunyo 30,2026.
Siya nahimugso sa Cagayan de Oro diin siya nagtungha sa elementarya sa City Central School,sekondarya sa Misamis Oriental General Comprehensive High School ug mi-gradwar sa Bachelor of Science of Electrical Engineering sa Xavier University.
Napili kini nga presidente sa Intergrated Institute of Electrical Engineers/IIEE ayha nagsilbing bise-presidente sa Business Devt sa Phinma.
Gilayong nasundan kini sa pagsilbi niya nga dean sa College of Engineering sa Cagayan de Oro College Phinma ning dakbayan.
Si Cabaraban ang igsoon sa Cagayanon beauty queen nga si Sharina Cabaraban-Domingo nga aktibo usab sa corporate world.
Kabahin sa tahas sa PNOC ang pagpalambo sa local petroleum ug ubang energy sources dinhi sa nasud.
