CAGAYAN DE ORO CITY – Naglikay mo-komento ang Philippine Army apan may gihimo na sila nga mga lakang kabahin sa expose ni Senadora Imee Marcos nga dunay plano nga mohimo’g supersonic missile attack ang China sa 25 ka lugar dinhi sa nasud.
Kini partikular nagtumbok sa mga lugar diin naka-posisyon ang napulo ka Enhanced Defense Cooperation Agreement o EDCA nga naglakip sa lokasyon sa kanhi domestic airport sa Brgy Lumbia ning syudad.
Miingon si Philippine Army spokesperson Col. Louie Dema-ala nga mismo na si AFP chief of staff Gen Romeo Brawner ang mihatag katin-awan nga negatibo ang maong impormasyon.
Apan siya miingon nga kabahin sa gipangandaman sa armadong kusog sa nasud ang dala nga bahad sa external security ilabina nga init ang bangi sa Pilipinas ug China sa West Philippine Sea issue.
