Gipasiugda ni Joseph Donato J. Bernedo, Administrator sa PHIVIDEC Industrial Authority, ang dakong papel sa Mindanao Container Terminal sa pagpalambo sa ekonomiya sa rehiyon.
Matod ni Bernedo, ang PHIVIDEC nagdumala og kapin 3,000 ka ektarya nga industrial estate.
Apan sa tan-aw sa ilang buhatan, usa sa labing dako nga asset karon ang MCT tungod sa dako nga kita nga ginahatag niini. Gibanabana nga mokabat sa 70 porsyento sa revenue sa ahensya ang gikan sa operasyon sa terminal.
Gipasabot usab niya nga dili lang kita ang sukdanan sa importansya sa MCT. Dako sab ang ambag niini sa social ug economic development sa Northern Mindanao, ilabina sa pagpalihok sa eksport ug import nga negosyo, paghatag og trabaho, ug pagdani og mga mamumuhunan.
Dugang pa ni Bernedo, ang MCT gikonsidera nga “South Gateway of the Philippines”, busa ang katawhan kinahanglan magtinabangay sa pagpanalipod ug pagmentinar niini.
Sumala kaniya, ang publiko mismo ang mahimong tigbantay aron masiguro nga magpadayon ang kaayohan nga ginahatag sa pantalan sa rehiyon ug sa nasud. (James Oliver)
