CAGAYAN DE ORO CITY, Philippines – Nagviral na ang video sa mga fans ni American singer-songwriter Taylor Swift sa Austria.
Nunot kini sa kalit nga pagkanselar sa dakung konsierto ni Swift tungod sa hulga sa terorismo.
Makita sa pipila ka segundos nga video clip ang mga batan-ong babaye nga nagpaninggit sa ilang emosyon gamit ang mga liriko sa awit ni Swift.
Sugdan unta niadtong Agosto 8 ug tak-upan sa Agosto 10 ang konsierto ni Taylor sa Vienna City.
Base sa ulahing report, ang grupong ISIS ang buot mangatake sa konsierto sa 34 anyos nga Popstar.
Una niini, dismayado si Mark del Rosario, usa sa mga Pinoy Swifties fan human madawat ang report nga kanselado ang show.
Milupad pa gikan Pilipinas padulong Austria si del Rosario aron masaksihan ang iyang idolo.
