CAGAYAN DE ORO CITY – Susihon sa hiniusang komitiba sa konseho ang dugay nang reklamo sa mga residente batok sa sobra kabaho sa hangin nga ilang malanghap gikan sa usa ka planta nga nag-proseso sa mga hugaw manok diha sa Zone 7,Upper Puerto ning syudad.
Kini human tuig 2015 pa nagsugod ang suliran apan daw inotil ang mga hingtungdang buhatan sa dakbayan sa hingpit pagsulbad niini.
Kini ang unod sa special report ni Kag Roger Abaday kinsa chairman sa komitiba sa environment sa konseho sa regular session nga gipadumala ni City Vice Mayor Jocelyn ‘Bebot’ Rodriguez.
Miingon si Abaday nga tungod sa maong reklamo,dungan sila mohimo’g ocular inspection sa komitiba sa panglawas ni Konsehal Malou Gaane sa Misamis Oriental Rendering Corporation aron hingpit nang maputol ang pag-antos sa katawhan sa maong lugar.
Samtang gisugyot sa kanhi army major general ug karon Konsehal Romeo Calizo ang paglusad sa ‘counter intelligence’ batok sa mga buhatan sa gobierno nga natahasan sa pagsiguro nga luwas ang panglawas sa katawhan batok sa nagkadaiyang polusyon sa palibot.
Kini maoy nakita ni Calizo kon nganong nagbalik-balik ang suliran sa sobra kabaho sa operasyon sa planta nga gitumbok sa special report ni Konsehal Roger Abaday diha sa Upper Puerto ning syudad.
Miingon si Calizo nga dili layo ang posibilidad nga dunay lapad nga kurapsyon nga natigayon tali sa pipila ka buhatan sa gobierno rason nga pabilin ang pag-antos sa katawhan nga namuyo duol sa maong planta.
