CAGAYAN DE ORO CITY-Gihupay sa kapolisan ang kabalaka sa publiko kabahin sa nadakpan nila nga tulo ka Maranao Muslims nga unang gitoohang sakop sa teroristang Maute sulod sa usa ka hotel sa Barangay Kauswagan sa syudad sa miaging semana.
Kini human gibutyag ni Cagayan de Oro City Police Office o COCPO spokesperson C/Insp Mardy Hortillosa nga dili mga sakop sa terorista sila si Oding Alamada;Sidic Casubedan ug Sainoden Bitiara nga nagpuyo sa sa Marawi City,Lanao del Sur.
Si Hortillosa miingon nga nalamabigit lamang ang mga suspek sa pagpayuhot sa gidiling droga ug wala mosulod sa kalihukang terorismo.
Kini subay sa gihimo nga pagsuhid ug pag-imbestigar sa nagkadaiyang intelligence units gikan sa PNP ug AFP tungod sa nakuha nga granada ingon man kalibre 45 nga armas ug electronic devices sulod sa hotel diin nadakpan ang mga suspek.
Apan bisan niini,anaa sa taas nga alerto ang kapolisan ug militar sa rehiyon tungod sa padayong bahad sa mga terorista dinhi sa nasud.
Sa pagkakaron,paslak na sa bilangguan ang mga suspek tungod sa kasong illegal possession of explosive;illegal possesssion of firearms ug pagbaligya ug paggamit sa gidiling droga.
Una nang gipanghimakak sa mga suspek nga sila mga terorista apan pipila kanila miangkon nga migamit kini sa shabu.
