CAGAYAN DE ORO CITY -Gihagit ni kanhi Phividec administrator Pompee La Viña ang mga komitiba sa kamarabaha ug senado nga palawman pa ang ilang imbestigasyon sa isyu sa presensiya sa illegal POGO ug paspas nga pagdaga sa Chinese nationals ning syudad.
Kini human iyang nasuta nga kutob lang sa pagduda apan kulang sa basehanan ang gisulti sa mga magbabalaod nga dunay POGO facilities nga naglihok sulod sa Phividec sa Tagoloan, Misamis Oriental.
Siya miingon nga kon dunay angay imbestigaron mao ang sayon nga pagpangabot sa pure blooded Chinese nationals nga hayan nakadawat sa ensaktong proteksyon gikan sa dagkong mga opisyal sa dakbayan.
Sa dihang mibutho ang pangalan sa negosyanteng Intsik nga si Tony Yang, nahimugso usab ang pasangil nga dunay ‘POGO TRIO’ nga naglihok dinhi sa dakbayan.
Hisayrang napatawag si Pompee ingon man si kanhi Phividec administrator Atty. Franklin Quijano tungod sa ilang kasayuran sa katukuran sa Philippine Sanjia Steel Corporation ni Yang diin sentro sa alegasyon sa smuggling activities ug illegal POGO operations.
