Hugot nga gikondenar ni Pope Leo XIV ang nagpadayon nga mga gubat sa nagkalain-laing bahin sa kalibutan samtang gipangunahan niya ang Holy Mass alang sa Palm Sunday of the Lord’s Passion sa St. Peter’s Square sa Vatican kagahapong adlawa.
Sa maong selebrasyon nga nagtimaan sa pormal nga pagsugod sa pagpamalandong sa Simbahang Katolika alang sa Holy Week, gipunting sa Santo Papa nga si Hesukristo giila isip Hari sa Kalinaw nga nagdala og mensahe sa gugma, panaghiusa, ug paglaum.
Sumala ni Pope Leo XIV, ang Dios nagasalikway sa bisan unsang porma sa kagubot ug dili maminaw sa mga pag-ampo sa mga nagdasig o nagpalala sa gubat.
Dugang pa niini, iyang gitan-aw ang pag-antos ni Kristo sa krus isip hulagway sa kasakit nga nasinati sa mga biktima sa gubat karon sa nagkalain-laing nasod, nga nag-awhag sa katawhan sa kaluoy ug pagtabang sa mga nag-antos.
Sa katapusan, gipasalig sa Santo Papa nga ang tinuod nga kahulugan sa pagtuo mao ang pagpangita sa kalinaw ug ang pagsalikway sa tanang buhat nga makadaot sa kinabuhi sa tawo. (by Phillip Ariata)
