NANAWAGAN ang Fish Section President sa Cogon Public Market nga si Mercy Trinidad sa tanang mga manindahay sa tanang seksyon sa merkado nga mentinaron ang kalimpyo sa ilang mga puwesto aron malikayan ang mga isyu ug estorya sama sa leptospirosis.
Sumala ni Trinidad, bisan dili tinood nga gikan sa isdaan ang giingong kaso sa leptospirosis sa syudad, importante gihapon nga magpadayon ang tanang vendors sa hustong paglimpyo sa ilang mga tindahan.
Mihangyo usab si Trinidad sa publiko nga dili magpalabi sa paghimo ug pagpakalat sa walay basihan nga estorya, kay dako kini og epekto sa panginabuhian sa mga vendors, ilabi na sa fish section.
Para ni Trinidad, mas angay unahon sa katawhan ang pag-atiman sa ilang kahimsog pinaagi sa kalimpyo ug paglikay sa kontaminadong tubig, imbis magpasamot sa kahadlok pinaagi sa dili tinuod nga impormasyon. (James Oliver)
