GIBUTYAG ni Ray Talimio Jr., former ORO Chamber President ug RDC-EDC Co-Chairman, nga ang presyo sa petrolyo posibleng mosaka hangtod P100 kada litro sa umaabot nga mga semana tungod sa kakulang sa supply gikan sa ubang nasud ug epekto sa kagubot sa Middle East.
Matod niya, ang China ug Russia nag-limit sa ilang export tungod sa strategic reserves ug uban pang rason, samtang ang epekto sa Ukraine crisis nagdugang sa kakapoy sa supply chain.
Bisan pa man ang Pilipinas adunay 50 hangtod 60 ka adlaw nga oil reserves, dili kini igo kon mosaka ang presyo sa commercial oil companies ug kung mahitabo ang kakulang sa global oil supply.
Gibutyag ni Talimio nga kung magpadayon ang tensyon, ang presyo posibleng moabot sa P88 hangtod P90 kada litro sa mosunod nga tulo ka semana, ug mahimo pa gani molapas sa P100 depende sa kalihukan sa merkado sa internasyonal.
Gi-awhag niya ang gobyerno ug mga konsumidor nga mag-andam ug magplano sa paggamit sa krudo aron malikayan ang sobra nga epekto sa katawhan ug sa ekonomiya. (By James Oliver)
