CAGAYAN DE ORO CITY – Gikondinar sa Police Regional Office 10 ang gihimong pagsunog sa rebeldeng New People’s Army o NPA sa pasilidad nga pahimutangan sa mga kamoteng kahoy particular sa mga bulanghoy sa Sitio Kalipay,Brgy San Luis,Malitbog,Bukidnon.
Miingon si PRO 10 Director Brig Gen Jaysen De Guzman nga usa ka linuog ang maong binuhatan ug angay lamang tulisukon kay dakong kawad-on sa tag-iya ang nahitabo sa iyang kabtangan.
Gawas niini,apektado usab ang panginabuhian sa mga trabahante sa maong istraktrura ga gipanag-iya sa negosyanteng si King Ragandang Zayas nga igo na lang nagpatala sa mga otoridad sa panghitabo.
Una nang giangkon sa mga rebelde nga sila ang misunog ug gidala ang armas ug duha ka radio sa sekyu nga nagbantay niini sa miaging Sabado.
Dumduman nga una nang gikondinar usab ni 4ID commanding general Major General Michele Anayron Jr ang maong linu-og nga binuhatan sa nabiling mga sakop sa NPA.
