CAGAYAN DE ORO CITY – Gi-depensa sa Police Regional Office 10 ang kamanduan sa Camp Alagar pinaagi ni Brig. Gen Jaysen De Guzman nga ipaubos sa subsob nga monitoring ang Chinese nationals nga nakabase sa Northern Mindanao.
Kini human unang namahayag si De Guzman nga ubos sa iyang liderato,dili na niini gusto nga masubli nga adunay mag-operate nga POGO facilities sa bisan asa nga bahin sa rehiyon.
Miingon si PRO 10 spokesperson Major Joann Navarro nga walay dautan sa kamanduan kay nagsumikad usab kini kang Pres Bongbong Marcos nga limpyuhan sa POGO operations ang Pilipinas.
Siya miingon nga pagsiguro usab kini nga adunay ensakto nga proteksyon nga mahatag pang-seguridad ang kapolisan ngadto sa bisan kinsa nga mga langyaw nga tig-bisitahan o nanimuyo sa rehiyon.
Samntang gitambagan ni Citizens Watch for Good Governance 10 convenor Atty Antonio Soriano nga seryusuhon sa Police Regional Office 10 ang ilang aksyon kabahin sa presensya sa mga Intsik dinhi sa rehiyon.
Kini agi’g reaksyon sa gisulti sa Camp Alagar nga adunay pagtutok nga himoon ang station commanders sa mga langyaw’ng Intsik nga anaa sa ilang tagsa-tagsa ka hurisdiksyon.
Miingon si Soriano nga dili lang angay mo-sentro sa POGO issue apan bisan sa aspeto sa seguridad.
Kini tungod kay dili kalikayan nga magduda ang katawhan kabahin sa presensya sa mga Intsik nga daw adunay postora nga mga sakop sa Chinese Liberation Army nga nakasulod sa nasud.
