CAGAYAN DE ORO CITY – Gipamugos ni Movement Against Tyranny in Northern Mindanao Region (MAT-NMR) spokesperson, Fr. Rolando Abejo nga dili relocation ang gikinahanglan sa mga lumad nga namakwit diha sa capitol grounds.
Sumala pa niini nga wala sila nagkinahanglan sa relokasyon ilabina nga sayod sila nga dili kini kaya ihatag sa gobyerno.
Maoy gusto matud pa sa mga lumad nga mobalik sa Sitio Camansi, Lagonglong, Misamis Oriental sa kondisyon nga e-pull out ang mga militar aron makapamuyo na sila nga malinawon.
Gani, gisaway ni Abejo ang slogan sa probinsiya nga Pag-taga Mis Or ka, Secure ka! tungod kay gipasagdan niini ang mga bata nga nagdaut diha sa capitol grounds human maulanan.
Samtang, gipanghimakak ni Provincial Legal Officer lawyer Cerillo Neil Pacana ang akusasyon nga pagpalambo sa turismo ang hinungdan kung nganong adunay mga sundalo diha sa Sitio Camansi, Lagonglong, Misamis Oriental.
Matud ni Pacana nga walay bisan piso nga naggasto ang provincial government sa maong lugar tungod kay walay turismo nga gitukod niini.
Gitubag usab ni Pacana ang gihimong pagsaway ni (MAT-NMR) spokesperson, Fr. Rolando Abejo sa slogan nga Pag-taga Mis Or ka, Secure ka! pinaagi sa pag-ingon nga wala pasagdi ang mga bakwit diha sa capitol grounds tungod kay ginasuportahan ang ilang mga pagkaon niini.
