Kinahanglan ipakita sa matag empleyado sa Kapitolyo Probinsyal ang Propersyonalismo, aron mas sayon maka-angay sa mga kabag-uhan ilawom sa bag-ong administrasyon.
Kini ang gibutyag ni Celso “Popoy” Abucejo, opisyal nga tagpamaba ni Misamis Oriental Governor Juliette Uy sa pakighinabi sa Bombo Radyo.
Sa naglabay nga flag raising ceremony sa Capitol Grounds, gipadumduman ni Abucejo ang tanan nilang empleyado nga gakson ug dawaton ang mga kausaban, kay kini ra ang epektibong pamaagi aron dungan mulambo ang matag usa sa probinsya.
Gibutyag ni Abucejo nga dili gusto sa gobernador ang pagbahin-bahin, tsismis ug bisan pagpangdaut gamit ang social media kay kini, usa sa mahimong babag sa pag-uswag, ug pagtunob sa pamatasang propesyonalismo, isip usa ka empleyado sa gobyerno.
Una nang namahayag si Governor Uy nga mas ipalambo niya ang kolaborasyon ug pagtinabangay aron paspas, ug hapsay ang paghatag serbisyo sa kapitolyo ngadto sa katawhan sa Misamis Oriental.
