CAGAYAN DE ORO CITY-Gipusil-patay sa wala nagpatoo nga pasahero ang driver nga samtang nagmaneho sa Gusa liner diha sa Tiano-Echem Streets ning syudad kagabii.
Giila ni Divisoria Police Station commander Sr/Insp Rogie Ortencio ang biktima nga si Cynth Allan Joseph Sullano,28 anyos,minyo ug nagpuyo sa Brgy Gusa sa dakbayan.
Gibutyag ni Ortencio nga nakaangkon sa duha ka igo sa ulo ang biktima gamit ang kalibre 45 nga armas gikan sa suspek nga tupad niya’g lingkod sa front seat.
Nasaksihan pa sa kapikas ni Soliano ang hitabo sanglit nag-uban kini sa pagpamasahero kagabii.Giimbestigaran pa sa mga otoridad ang motibo sa kremin.
Samtang nagdanguyngoy nga nangayo’g hustisya ang kapikas sa jeep driver nga dul-it gipusil sa wala mailang suspek.
Miingon ang kapikas nga si Hazel Grace Sullano nga madumduman pa niya ang dagway sa suspek kay katupad niya’g lingkot sa front seat dihang nahitabo ang kremin.
Namahayag si Sullano nga wala siya’y bisan unsa nga nadumduman nga dunay gikabikil ang iyang bana sa wala pa pusila kagabii.
Una usab niini,gibutyag sa konduktor sa biktima nga kanhi tiggamitan sa ilegal nga droga si Sullano apan nagpaubos na kini sa Toktok Hangyo sukad tuig 2017 sa ilang brgy.
