CAGAYAN DE ORO CITY – Nadakpan sa tropa sa Philippine Drug Enforcement Agency 10 ang aktibong pulis nga kanhi na napriso gumikan sa gihapon sa pagpayuhot sa ilegal nga droga dinhi sa syudad.
Kini human ilusad sa PDEA 10 operatives ang entrapment operation batok kang Police Staff Sargeant Santiago Lumangcas,hingkod ang edad sa Upper Lumbia ning syudad.
Saysay ni PDEA 10 regional director Atty. Benjamin Gaspi nga nakuha gikan sa dinakpan ang 110 gramos sa gitoohang shabu nga dunay market value nga sobra 700-mil pesos ug ubang mga ebedensiya.
Siya miingon nga kini na ang ikaduhang higayon nga nadakpan si Lumangcas kay kanhi na siya nabilanggo resulta sa pagkadakpi sa PDEA-MisOr Team sa mismong balay niini sa Brgy Macasandig diin nabawi ang 20 gramos nga shabu ug M-16 rifle nga armas sa miaging Hulyo 2013.
Dugang ni Gaspi nga samtang kamulo ang kaso ni Lumangcas,naila usab niini ang dagkong suppliers sa ilegal nga droga nga naglakip sa usa ka alyas Marimar nga taga-Maguing ug Datu Salik nga naglihok sa Lanao del Sur.
Apan napugos pagpagawas ang korte sa akusado kay nasunog ang Hall of Justice sa Enero 2015 diin apil ang mga ebedensiya sa iyang kaso.
Sa pagkatuig 2020,nakabalik serbisyo si Lumangcas apan subay sa paniid sa PDEA ug ubang intelligence agencies, pabiling nalambigit kini sa ilegal nga droga nga kuhaon ang suplay sa Talakag nga gikan sa Maguing,Lanao del Sur.
Gi-promotar usab sa ranggo nga staff sargeant ang suspek rason nga nahimo kining assistant investigator sa Initao Municipal Police Station.
Hisayrang kanhi na-destino sa Camp Alagar si Lumangcas diin nakabase ang Police Regional Office 10 sukad kini nahimong pulis niadtong Oktobre 30, 1996.
