CAGAYAN DE ORO CITY – Atubangon sa aktibong pulis ug kaubang sundalo ang patung-patong nga kasong kriminal nga ipasaka sa Cagayan de Oro City Police Office batok kanila sa piskalya sunod semana.
Giila ni COCPO spokesperson Maj Evan Viñas ang mga dinakpan nga sila si Patrolman Bhenjie Torib,26 anyos,ulitawo,intelligence operative sa Cugman Police Station ug taga-Sugbongcogon,Misamis Oriental ug Army Sgt Erenio Besonia Jr,34 anyos,aktibong sakop sa 4th ID,Philippine Army nga taga-Lala,Lanao del Norte.
Miingon si Vinas nga gidakop ang duruha kay kadudahan ang ilang pagpamugos nga kuhaon ang motorsiklo nga nakompiskar sa Carmen Police Station gikan sa anti-theft operation sa Brgy Carmen sa miaging gabii.
Gibutyag sa opisyal nga kasong pagsupak sa obstruction of justice,disobedience in a person in authority ug gun ban violation ang ipasaka ni Carmen Police Station commander Maj Mario Mantala Jr batok mga suspek.
Gi-alegar sa mga pulis nga nagpakita sa pagkawalay tahod ang maong mga suspek kang Mantala sulod sa opisina,rason nga sila gipangdakop.
Hisayrang namugos ang mga suspek nga kuhaon nila ang motorsiklo kay giingong gipanag-iya kini sa ilang asset.Gisulayan sa Bombo Radyo makuha ang ilang panig apan mas gipili nila nga magpakahilom sa maong isyu.
