CAGAYAN DE ORO CITY – Nakakuha’g simpatiya gikan sa usa ka pundok sa pagtoong Katoliko ang pasado nga absolute divorce bill sa kamarabaha.
Kini bisan kon dakong porsyento sa katawhang Pilipinhon ang pabiling supak sa sugyot rason nga dugay nakalusot sa kamarabaha alang sa ikatulo ug pinal nga pagbasa.
Namahayag si Bishop Joseph Lagumbay sa Catholic Universalist Church of Asia Pacific nga dili angay mapihig ang ihap sa kababayen-an nga dugay nang nag-antos sa pisikal nga abuso ug napasagdan sa ilang mga pares sulod sa pamilya.
Kini ang rason nga mikuyog ang ilang grupo ngadto sa mga pundok nga naghingusog nga itugot na ang pagbaton sa balaod nga disborsyo sa nasud.
Gibutyag usab si Lagumbay nga gitahod nila ang mga tawo o mga grupo bnga pabiling supak sa maong isyu.
Siya miingon nga labing maayo gihapon nga barugan sa mga tawong dunay hugot ang pagtoo sa bili sa kaminyoon kay demokrasya man ang nasud.
Una nang nakakuha’g 126 ka boto sa mga kongresista nga pabor sa balaodnon,109 ang supak ug 20 ang nag-abstain.
