CAGAYAN DE ORO CITY – Nagkampeon ang Cagay-anong tennis player nga si Francis Casey Alcantra ug Jeson Patrombon nga taga-Iligan City sa MEN’s DOUBLES sa Southeast Asian Games sa Rizal Memorial Sports Complex.
Kini human pildiha ni Alcantara ug Patrombon ang tandem nila Treat Huey ug Ruben Gonzales Jr sa final score nga 7-6 ug 7-5.
Nahimong tensyonado pag-abot sa second set kay pulos naglisod ang duha ka team makakuha sa abanse.
Apan sa dihang may kapakyasan na si Gonzales,wala na buhi pa ni Alcantra ug Patrombon ang momentum aron makuha ang kadaugan alang sa medalyang bulawan.
Miingon si Alcantara nga nalipay sila ni Patrombon sa ilang kadaugan apan gipasalamatan si Treat ug Gonzales gumikan sa gipakita nga kalig-on sa ilang dula.
Gani, giangkon usab ni Patrombon nga na-presyur sila ni Alcantara ilabina nga mga Pinoy ug team-mates ra nila ang nakasangka alang sa final match sa maong dula.
Hisayrang ulahi nakahatag sa gold medal sa Pilipinas si Treat kuyog si Denise Dy sa ilang giapilan nga dula nga mixed doubles sa SEA Games 2015.
