CAGAYAN DE ORO CITY – Grand slam winner ang dakbayan sa El Salvador sa Seal of Good Local Governance (SGLG) sa Department of Interior and Local Government (DILG) ning tuiga.
Kini human sunod-sunod nga nakuha sa El Salvador City ang maong pasidungog gikan tuig 2017, 2018 ug 2019.
Base sa anunsiyo sa DILG-10, duha lamang ka lugar sa tibook rehiyon ang nahimong SGLG awardee nga gilakipan sa Valencia City.
Sa pakighinabi sa Bombo Radyo, giangkon ni El Salvador City Mayor Edgar Lignes nga dako ang iyang gibate nga kalipay tungod kay pangandoy usab sa ubang lideres ang maong pasidungog.
Apan, gitin-aw sa alkalde nga iyang ipahinungod ang maong kadaugan sa mga molupyo sa El Salvador nga iyang gipasaligan sa ”good governance”.
Maoy gibasehan nga sukdanan aron makuha ang maong award, kinahanglang pasado ang lokal nga kagamhanan sa Financial Administration, Disaster Preparedness, Social Protection, ug Peace and Order.
Ning tuiga, mas gipalig-on pa ni Presidente Rodrigo Duterte ang SGLG pinaagi sa gilagdaan nga Seal of Good Local Governance Act of 2019.
Nakalatid sa maong balaod nga hataga’g pag-ila ang mga lokal nga kagamhanan nga nagmalampuson pagpalambo sa ilang komunidad pinaagi sa ilang mga programa ug polisiya.
