CAGAYAN DE ORO CITY – Gitambagan ni Cagayan de Oro 1st District Representative Atty. Lordan Suan ang alyado ni kanhi Pres Rodrigo Duterte nga si 2nd District City Councilor Girlie Balaba nga iundang na ang pagsabwag sa mga intriga ug mga fake news.
Kini ang tubag ni Suan kabahin sa hagit ni Balaba nga mohimo’g public pronouncement aron pamatud-an nga bakak ang iyang gisulti nga dili tinood ang gipamugos ni Duterte nga daghang blank items ang 2025 natl budget ni Pres Bongbong Marcos.
Miingon si Suan nga mas maayo nga mag-pokus si Balaba sa pagtabang masulbad ang daghang mga suliran sa dakbayan kay ipakatag ang fake news.
Una niini,andam si Balaba nga mohimo sa pasaylo kon kini nasayop sa iyang gitoohan.Hisayrang si Balaba ug Duterte ang suod nga managhigala sa dugay nang panahon.
Siya miingon nga seryoso ang nadiskobrehan nila ni Duterte ug Davao City 3rd District Cong. Isidro Ungab ang 28 ka pahina sa bicameral committee report nga blangko nga dakong kasupakan sa balaod.
