CAGAYAN DE ORO CITY – Nabawi’g balik sa retiradong huwes nga taga-Quezon City nga igo lang adunay gibisita sa Cagayan de Oro City ang ilang mahalong mga cellphones ingon man nagkadaiyang money denominations nga gikawat sa 20 anyos nga suspek sa gisak-an nila nga subdibisyon ning syudad.
Kini human paspas nga nasubay sa mga biktima kuyog ang Carmen Police Station ang lokasyon sa suspek gamit ang iPhone tracker app hinungdang natultulan ang gitaguan niini sa Pabayo Street,Brgy 3 gikan sa paghimo sa kremin.
Matud ni Police Regional Office 10 spokesperson Major Joann Navarro nga maoy nadakpan si alyas Boboy,ulitawo nga nagpuyo sa Calaanan,Brgy Canitoan ning syudad ug nakuha ang mga kinawat nga kabtangan.
Sumala sa imbestigasyon,nadiskobre sa mga biktima nga pugsanong gisulod sa suspek ang ilang gisak-ang balay sa uptown sa bandang kadlawon diin nadala na ang ilang tulo ka cellphones ug mga klase-klaseng salapi.
Kabahin sa nakawat apan nakuha’g balik sa mga biktima ang duha ka iPhone units nga dunay kostar nga 50-mil pesos,Samsung S711 brand nga kantidad 36-mil pesos ingon man mga kuwarta.
Gilangkuban kini sa duha ka tag-un-dolyares,upat ka tag-10 Canadian dollars,duha ka tag-5 Canadian dollars,10 Euro ug Philippine pesos nga 3-mil 300.
Nasuta nga dugay nang wanted ang suspek sa kasong pagpangawat hinungdang gilayon usab kini gisilbihan sa warrant of arrest sa kapolisan sa Divisoria Police Station.
Kasong pagpanulis ang gipasaka batok sa dinakpan sa piskalya ning syudad.
