(Update) CAGAYAN DE ORO CITY – Gihunong na sa national ug local disaster teams kuyog ang tropa sa PNP,AFP,PCG ug BFP ang retrieval operations sa landslide site sa Sitio Mabuhay,Brgy San Luis,Malitbog,Bukidnon.
Kini human hingpit nang nakit-an sa retrieval teams ang katapusang biktima sa landslide nga si Raffy Simpruta nga apil sa nahugnuan sa midahiling yuta sa maong lugar sa miaging mga semana.
Gibutyag ni Malitbog MDRRMO rescuer Jeryl de la Cruz nga gihunong na ang operasyon ug ibalik lamang ang nakalit nga yuta sa orihinal nga porma paglabay sa adlaw sa mga santos ug kalag.
Miingon si De la Cruz nga una nang gihatagan sa tumang pag-atiman ni Malitbog Mayor Gary Casiño ang pagluwas sa mga biktima apan gumikan sa kalisod sa sitwasyon,napakyas sila pagluwas niini
Kini ang hinungdang gipadala pa sa national govt ang pipila ka personahe sa National Disaster Risk Reduction and Management Council ug Metro Manila Devt Authority aron mapadali ang operasyon.
Hinoon,igo nahidangat ang Manila-based retrieval team,nahaw-as na sa local disaster operators ang upat sa mga biktima.
Hisayrang gawas kang Simpruta,namatay usab ang mga kauban niini nga sila Lucrecio ug Angelita Labronal;Jordan Vincent Achas ug Nerio Talines nga pulos residente sa maong lugar.
