(Updated correction) CAGAYAN DE ORO CITY – Wala na makaabot sa kasaulugan sa pasko ang Rural Transit Mindanao Incorporated o RTMI bus conductor human matumbahi’g kahoy’ng ‘buli’ sa Purok 2, Brgy Del Pilar,Balangiao,Misamis Occidental.
Giila ni Balangiao Police Station commander Police Lt.Mustapha M Umpar ang biktima nga si Gary Tongco, 35 anyos,taga-Aloran,Misamis Occidental samtang ang RTMI bus driver mao si Ricardo Payosan,46 anyos.
Gikan dinhi sa syudad ang bus nga dunay sakay nga sobra 20 ka pasahero ug padulong sa Dipolog City sa dihang natigayon ang hitabo.
Direkta nga natumbahan ang atubangan nga bahin sa bus diin nakalingkod si Tongco hinungdan sa hinanali nga kamatayon niini.
Hinoon,wala maunsa ang mga pasahero samtang nakabaton sa gamay’ng bun-og sa lawas ang bus driver sa hitabo sa miaging adlaw’ng Domingo.
Sama sa naandan,gitubag sa tigdumala sa kompanya ang maong obligasyon.
Hisayrang sulod sa pipila ka tuig,wala na’y dagkong mga aksidente nga nalambigitan ang RTMI bus dinhi sa Mindanao region gumikan sa walay hunong nga pasidaan sa mga tigdumala ngadto sa ilang mga personahe.
