(Update 2) CAGAYAN DE ORO CITY – Kasuhan gihapon sa kapolisan sa obligasyong sibil ang tigdumala sa kompanyang Rural Transit Mindanao Incorporated o RTMI ug ang tag-iya sa wing van nga nagsilbing fish car nga nagkabangga resulta sa kamatayon sa duha ka drivers ug 3 ka pasahero niini sa Purok 1,Brgy Burnay,Gitagum,Misamis Oriental.
Kini bisan kon mihimo na sa pag-atiman ang RTMI sa namatay’ng mga biktima ug 11 ka samaron sa dugu-ong aksidente kagahapon sa kadlawon.
Miingon si Gitagum Police Station commander Police Maj. Dennis Cerilla nga mahimong ang mga tag-iya sa RTMI bus ug wing van ang kasuhan sa mga pamilya sa nadisgrasya kay pulos naman patay ang mga drayber.
Siya miingon nga maoy namatay sila bus driver Rovell Pagasian nga taga-Iligan City ug fish car driver Silvino Flores Jr nga residente sa Aurora,Zamboanga del Sur;Lorenzo Ejan nga taga-Brgy Bagong Taas,Valencia City,Bukidnon;Thelma Thelma Galleon ug Margarita Tagalog gikan usab sa Zamboanga del Sur.
Samtang matudlo nga sad-an ang nagmaneho sa fish car nga si Flores Jr kon nganong mi-resulta sa kamatayon sa lima ka tawo ang dugu-ong aksidente sa lungsod.
Miingon si Cerilla nga mismo ang fish car ang mikawat sa lane nga gisubay sa bus rason nga natigayon ang aksidente.
Giklaro usab niini nga walay pagbuto sa ligid sa fish car sukwahi sa unang report kay nadunggaan sa mga pasahero ug mga tawo sa palibot.
Siya miingon nga tungod sa kakusog sa impact sa bangga,naputol pa ang tiil ni Flores samtang naipit pagmaayo ang lawas ni Pagasian sa ilang pag-responde kagahapon sa kadlawon.
