Mihimo na ug lakang ang Lokal nga Pangagamhanan sa Cagayan de Oro (LGU-CDO) batok sa mga motor ug sakyanan nga adunay sobra ka samok ug ilegal nga muffler.
Gihatagan og go-signal ni Mayor Rolando “Klarex” Uy ang usa ka composite team nga gilangkuban sa Cagayan de Oro City Police Office (COCPO), Roads and Traffic Administration (RTA), ug Land Transportation Office (LTO) aron istrikto nga ipatuman ang balaod ug regulasyon batok sa maingong mga muffler sa siyudad.
Sumala ni Konsehal Eric Salcedo, ipatuman ang maong lakang human daghang residente ang mireklamo kabahin sa kusog ug giusab nga mga muffler nga naglibot sa siyudad adlaw ug gabii, hinungdan sa noise pollution ug dakong kabalaka sa publiko.
Gipunting usab ni Salcedo nga lakip sa gi-prioritize nga aksyon sa team ang pagprotektar sa kalinaw sa dalan ug paglikay sa posibleng aksidente.
Ang operasyon gipangulohan sa COCPO aron masiguro ang enforcement ug masilotan ang mga violators sumala sa balaod.
