Gipasalig ni Department of Public Works and Highways (DPWH) Secretary Giovanni Lopez nga komitado ang kagamhanan sa paghuman sa mga proyekto sa tibuok nasud bisan pa man sa pagbalhin sa pamunoan gikan kang kanhi Secretary Vince Dizon ngadto kaniya.
Matud ni Lopez, gimando ni Presidente Ferdinand Marcos Jr. nga kinahanglang ipadayon gihapon ang mga obligasyon ug proyekto nga wala nahuman ni Dizon.
Dugang pa sa bag-ong kalihim, ang maong pasalig nga basi sa direktiba sa Presidente kay wala magdepende sa bisan kinsang inidbidwal nga opisyal, apan usa kini ka obligasyon ngadto sa katawhang Pilipino.
Gihatagan usab og gibug-aton ni Lopez nga ang pagbag-o sa pagpangulo kay dili angay makaapekto sa obligasyon sa ahensya nga mahatagan og luwas nga dalan ang katawhan.
Dugtong niini, gibutyag usab sa kalihim nga walay nahitabong kabag-ohan sa liderato ug mga posisyon sa mga personahe sa regional ug district offices sa tibuok nasud nga nagpasabot nga kinahanglan nilang tumanon ang ilang mga obligasyon ug kompletohon ang tanang mga proyekto sa tukmang oras. (raniel mahunyag)
