CAGAYAN DE ORO CITY – Nagkatagbo sa ikaduhang higayon ang tropa sa kapolisan,militar ug Philippine Coast Guard alang sa tinguha nga makab-ot ang hapsay ug malinawon nga pagpahigayon sa 2025 elections sa Northern Mindanao.
Kini bisan kon wala pa mohimo’g pagpatawag ang Commission on Elections o Comelec alang sa mga lakang pang-seguridad nga ipatuman aron masiguro nga walay dagkong mga suliran sa mismong adlaw sa bugnong lugaynon sa mga kandidato sa Mayo 12.
Miingon si Police Regional Office 10 spokesperson Major Joann Navarro nga gihimo ang panagkita sa tulo ka ahensiya pinaagi sa Joint Peace and Security Coordinating Council Meeting o JPSCCM sa mismong Camp Alagar ning syudad sa miaging semana.
Namahayag si Navarro nga gisukod sa konseho ang kapas ug kakulangon sa security sector aron mapangitaan sa laing mga paagi samtang wala ang piliay.
Siya miingon nga dagha’g natuki sa maong tigom apan limitado una nga masayran sa katawhan sanglit nag-sentro kini sa katibuk-ang seguridad sa rehiyon.
Himoon ang ikatulong JPSCCM sa headquarters na usab sa PCG sa dili madugay.
Hisayrang kaabag sa Comelec ang tulo ka ahensiya sa paghatag seguridad sa election period ilabina sa mismong adlaw sa pagpahigayon sa piliay.
