CAGAYAN DE ORO CITY, Philippines – Mipasalig ang Department of Agriculture nga aksyunan ang posibleng pagnihit sa supply ug pagsaka sa presyo sa itlog pag-abot sa Abril o second quarter, ning tuiga.
Namahayag si Agriculture Secretary Francisco Tiu Laurel Jr., nga ang gitakdang pagkunhod sa supply maoy epekto sa oversupply ug sobra ka barato nga presyo sa itlog sa miaging tuig.
Mahinumduman nga tungod sa grabeng pag-ubos sa kinitaan sa mga poulty farmers napugos sila’g patay sa ilang manok nga gapangitlog epekto sa pagkuyanap sa Newcastle Disease (ND) sa Pangasinan sa tuig 2022 ug ang Avian Influenza (H5N1) sa tuig 2023.
Hinoon, milaum ang kalihim nga dili musaka ang presyo sa itlog gikan sa kasamtangang 8 ug 9 pesos matag usa.
Gumikan niini, milaraw ang DA sa pagpaligid sa mass vaccination batok avian influenza (AI) sa Marso ngadto Abril aron malikayan ang krisis nga miigo sa Estados Unidos tungod sa padayon nga paglapad sa HPAI o Highly Pathogenic Avian Influenza, lakip na ang talagsaon klase sa bayrus sa manok nga ginganlana’g H5N9.
Gitin-aw ni Laurel nga andam ang ahensya nga tabangan ang lokal nga mag-uuma sa importasyon sa gapangitlog nga manok pinaagi sa pagpa-utang kanila.
