Wala pay balaod sa social media ban sa mga mga nagpangidad sa 16 anyos pa ubos sa Pilipinas. Kini ang gipadayag ni Konsehal Maximo Rodriguez III, Chairman sa Committee on Social Services sa syudad. Gii-ing ni Rodriguez nga napatuman na ang maong balaod sa nasud sa Australia tungod sa dili maayong epekto niini sa kabatan-onan. Uyon siya nga ipatuman usab kini sa Pilipinas aron maprotektahan ang mga bata gikan sa sobra nga paggamit sa teknolohiya. Gipasiugda niya nga makatabang kini sa paghimo og mas luwas nga palibot para sa kabataan.
Dugang pa ni Rodriguez, dako kaayo ang ma tabang ang sugyot sa pagsumpo sa mga krimen sama sa OSAEC o Online Sexual Abuse and Exploitation of Children. Iyang gipadayag nga ang ilang dakbayan mao ang ikaduha sa tibuok Mindanao nga adunay pinakadaghan nga kaso sa maong krimen. Sa iyang panan-aw, ang regulasyon sa paggamit sa social media ug gadgets makapamenos sa mga oportunidad sa pagpang-abuso. Kini iyang giisip nga importante nga lakang aron mapanalipdan ang kabataan batok sa peligro nga online nga kalihokan.
Gilaraw usab ni Rodriguez nga i-lobby ang ideya sa national level pinaagi kang Congressman Rufus Rodriguez aron mahimo kini nga balaod. Tumong sa panukala nga batukan ang dili maayong epekto sa sobra nga paggamit sa social media ug gadgets sa mga menor de edad. Gipunting niya ang risgo sa pagkaadik sa online games ug digital platforms nga dili pa angay pokusan sa mga bata sa ilang edad. Pinaagi niini, naglaum siya nga makatabang ang balaod sa paghulma og mas maayong kaugmaon para sa kabataan.
