CAGAYAN DE ORO CITY-Ipatawag sa Sangguniang Panlalawigan o SP-Misamis Oriental ang mga representante sa Department of Environment and Natural Resources o DENR-10, Holcim Philippines Incorporated o HPI ug ang Bureau of Customs o BoC sunod semana.
Tumong niini nga mohatag katin-awan sa 162 ka toneladang basura gikan Australia nga gipasulod sa Mindanao Container Port sa Tagoloan,Misamis Oriental.
Miingon si SP board member Boboy Sabal nga pangulohan sa Committee on Environment ang himoon nga committee hearing. Naglaum si Sabal nga motunga ang tanang mga representante aron masulbad ang maong suliran.
Samtang gikalipay ni Mindanao Container Port o MCP collector John Simon sa Bureau of Customs ang lakang sa Sangguniang Panlalawigan nga magpatawag sa committee hearing sa mga basura gikan sa Australia.
Si Simon miingon nga naghinam-hinam na siya nga maatubang sa himoong pagdungog aron mahibal-an kon sa unsang paagi nakalusot ang 162 ka toneladang basura padulong ning lalawigan.
Hisayran nga human sa basura gikan sa Australia,laing mga basura gikan sa Hongkong ang na-diskobrehan sa Mindanao Container Port nga nakatanggong sa pantalan sa maong lugar.
