GIBARUGAN ni Cagayan de Oro 1ST District Rep. Cong. Lordan Suan ang iyang giapilang bersyon sa Anti-Political Dynasty Bill ubos sa House Bill 6799 nga matod niya mas makahatag og klaro ug patas nga regulasyon kon ipasar sa Kongreso.
Atol sa ikaduhang hugna sa public consultation nga gipahigayon sa University of Science and Technology of Southern Philippines kagahapon, giingon ni Suan nga kon ipatuman ang maong balaod, kinahanglan “all-in” kini ug walay bisan unsang exemptions.
Sumala sa kongresista, iyang barugan nga usa lamang ka miyembro sa pamilya ang mahimong mudagan sa bisan unsang pwesto sa gobyerno sa Pilipinas aron malikayan ang konsentrasyon sa gahum sa usa ka angkan.
Gipasabot usab niya nga ang tin-aw ug walay lusot nga probisyon sa balaod maoy makatabang sa paglig-on sa demokrasya ug paghatag og patas nga kahigayunan sa ubang lider nga gustong mosulod sa serbisyo publiko.
Ang maong public consultation kabahin sa padayong diskusyon sa Kamara sa posibilidad nga mapasar ang usa ka komprehensibong Anti-Dynasty Law sa nasud. (James Oliver)
