Gipasalig sa National Food Authority Region 10 nga walay kinahanglang kabalak-an ang publiko sa supply sa bugas taliwala sa nasinati nga hulga sa Super El Niño.
Namahayag sa Bombo Radyo si Regional Director Miguel Teczon nga gipaspasan ug gipokus na karon sa ilang buhatan ang pagpangpalit sa mga humay sa nagkadaiyang dapit sa Bukidnon, Misamis Occidental, ug Lanao del Norte.
Gipasabot sa opisyal nga nagpabilin nga lig-on ang pondo ug buffer stock sa bugas sa tibuok rehiyon tungod sa maayong ani sa mga lokal nga mag-uuma.
Tungod niini, nagpadayon usab ang matag adlaw nga pagbaligya sa baratong bugas sa mga opisyal nga outlet sa kagamhanan aron matabangan ang katawhan.
