CAGAYAN DE ORO CITY-Nabalaka ang Cagayan de Oro Farmers Market and Terminal Association o COMFTA nga mahutdan sa suplay sa mga utanon ang rehiyon sunod semana.
Matud ni COMFTA Pres Peter Sumabong nga grabe ang demand sa utanon sa Luzon ug Visayas human gilampurnas ni Bagyong Ompong.
Gani, mismo ang mga negosyante sa kauluhan ang nangunay pagpangumpra sa mga utanon sa vegetable landing area sa Westbound terminal sa Brgy Bulua ning syudad.
Nagtoo si Sumabong nga mas momahal pa ang presyo sa mga utanon sa umaabot mga adlaw tungod sa taas nga demand ug ubos nga suplay.
Asoy ni Sumabong nga nakapasamot sa pagmahal sa presyo sa mga gulay ang programa sa Department of Agriculture diin ilang paliton ang produkto sa mga mag-uuma aron ipadala sa kauluhan ug wala na’y mabilin sa traders hinungdan nga magkulang ang suplay ug mosamot kamahal ang presyo sa mga gulay.
Apan gitin-aw sa Department of Agriculture o DA-10 nga wala nila palita ang produkto sa mga mag-uuma.
Sumala ni DA regional director Carlene Collado nga maoy ilang gihimo ang market linkage aron mas makaminus sa presyo sa gulay ang mga konsumante ilabina nga direkta na sila nga makapalit ngadto sa mga mag-uuma.
Apan gibutyag ni Collado nga sagad sa mga mag-uuma ang mapugos pagbaligya sa ilang produkto sa mga traders sa ubos nga presyo tungod kay nakautang na sila sa puhunan.
Gibutyag ni Collado nga may himoon nga programa ang ilang ahensya sunod bulan ning tuiga.
Kini nga programa nag-pokus sa expansion sa yuta nga tamnan sa mga gulay sa Impasug-ong, Talakag Sumilao ug Lantapan, Bukidnon aron dili magkulang ang suplay.
Dugtong niini, ipatawag sa DA ang mga mayor, municipal agriculturist, engineer ingon man ang asosasyon sa mga mag-uuma.
Samtang nagbutyag usab si Collado nga ipadala na nila ang suplay sa utanon padulong sa Luzon area ugmang adlawa.
Siya miingon nga bag-o lamang naka-harvest ang mga mag-uuma aron ipadala sa kauluhan.
Nanghinaut si Collado nga makatabang kini sa kakulangon sa suplay sa mga gulay sa mga lugar nga apektado sa dautang panahon.
