Na-abtan na lang sa Bagyong Basyang ang syudad, apan, wala gihapon tubag ang Cagayan de Oro Water District sa “letter request” nga gisumite sa ilang bulk water supplier ang Cagayan de Oro Bulk Water Incorporated. Kini aron unta ipa-ubos sa rehabilitasyon ang water filter beds sa COBI nga apektado pagbaha sa miaging Enero 2 ning tuiga.
Sumala ni Atty. Roberto Rodrigo, Senior Legal Counsel sa COBI, ikaduha na kini nga higayon nga ilang gihangyo ang COWD, apan giingnan lang sila nga maghulat sa press conference ug ipalabay una ang selebrasyon sa Chinese New Year.
Sa mas sayo nga pamahayag, gipunting sa COBI nga samtang layo pa ang maong okasyon, gusto na nilang limpyuhan ang filter beds nga naapektuhan sa pagbaha hinungdan sa pagminus sa rasyon sa tubig sa Distrito 2.
Namugos si Rodrigo nga kinahanglan hinanali nga maipatuman ang rehabilitasyon tungod sa pagkadaot sa watershed desk ug rapid operation system nga naapektuhan sa flash flood.
Ang plano nga rehabilitasyon gisugyot pa kaniadtong Enero 12 ug gilauman nga sugdan sa ikaduhang semana sa Pebrero, apan wala pa gihapon aksyon gikan sa water district.
Alang sa COBI, ang padayon nga kakulang sa aksyon nagpasabot nga magpadayon usab ang problema sa barado nga filtration system nga kinahanglan limpyuhan 3–4 ka beses matag adlaw, ug makapakunhod sa kapasidad sa suplay nga kasagarang moabot sa 80 milyon ka litro matag adlaw, nga direktang makaapekto sa mga konsumidor sa syudad.
