Maigo ang halos tanang opisina nga sakop sa Opisina sa Gobernadora sa Misamis Oriental sa pagkibhang sa proposed budget alang sa fiscal year 2026.
Aminado si Special Assistant to the Governor Celso Abucejo nga 95 porsyento sa mga opisina nga attached sa Opisina sa Gobernadora ang apektado sa gipakgang budget.
Butyag ni Abucejo, tungod sa pagpaksi sa pondo nga alang unta sa mga programa karong tuiga, wala nay laing nabuhat ang Gobernadora kundili ang pagpagawas og memorandum nga tangtangon ang kapin sa 1,800 ka Job Order ug casual employees sa Kapitolyo Probinsyal.
Matod pa niya, maglisod na ang probinsya sa pagpasweldo tungod sa gamay nga pondo karong tuiga.Bisan pa man niini, padayon pang gihulatan sa Kapitolyo Probinsyal ang amended version sa budget gikan sa Sangguniang Panlalawigan, aron masuta kung asa ug unsang mga pondo ang gipangbawion o gipakgang.
Sa laing bahin, giklaro ni Abucejo nga dili una mosugal ang Gobernadora sa pag-hire og bag-ong Job Order employees karong tuiga, tungod sa posibilidad nga dili sila maswelduhan. (James Oliver)
