CAGAYAN DE ORO CITY- Nagtibangay ang napulo ka imbestigador sa Bureau of Fire Protection sa pag-imbestigar sa hinungdan sa pagkasunog sa munisipyo diha sa Sugbongcogon, Misamis Oriental.
Si BFP Task Force head SF01 Johan Rana miingon nga may lead na sila nga posibleng hinungdan sa pag-ulbo sa kalayo apan nagdumili una kini pagbutyag sa publiko.
Siya miingon nga daghang anggulo ang ilang giimbestigahan ug kabahin na niini ang posibilidad nga arson ug electrical wiring.
Dugang pa niini nga molungtad pa sa 45 ka adlaw ayha nila hingpit mabutyag sa publiko ang resulta sa ilang imbestigasyon sa hinungdan sa munisipyo nga mitala sa P4 milyon ang structural damage.
Samtang kumbinsido si Sugbongcogon Mayor Meldrid Lagbas-Mondigo nga wala tuyua ang pagkasunog sa ilang munisipyo.
Gibutyag niini nga posibleng nabiyaan nga aircon sa likod nga bahin sa ilang munisipyo ang tinubdan sa sunog.
Asoy niini nga anaa sa P11 million ang damyos sa sunog nga gilakipan sa structural damage ug ang mga kagamitan sa munisipyo.
Hisayran nga nahurot kaugdaw ang maong gambalay diin nagsumikad ang kalayo sa bodega.
Hinoon,walay tawo nga natala nga samaron o namatay sa pag-ulbo sa sunog.
