CAGAYAN DE ORO CITY-Gidepensahan ni Task Force Bangon Marawi chairman Sec. Eduardo del Rosario ang pahayag ni Pres Rodrigo Duterte nga dili na tabangan ang mga tawo sa Marawi City nga subling matukod ang ilang panimalay nga naguba tungod sa giyera.
Gipasabot ni Del Rosario nga ang mga adunahan nga negosyate lamang ang dili ipa-apil pagtabang aron subling pagtukod sa ilang mga pribadong gambalay.
Matud ni Del Rosario nga dili otorisado ang gobyerno nga maghatag pondo sa pagtukod sa mga balay sa mga sibilyan.
Hinoon namahayag ang task force bangon Marawi chairman nga may balaudnon na nga gustong mugnaon sa mga magbabalaud aron mahimong legal ang pagtabang sa mga tawo ilabina sa MAA.
Samtang gitawag sa pipila ka mga residente sa Marawi City nga layo sa kamatuoran ang gibutyag sa Task Force Bangon Marawi nga rehabilitasyon.
Miingon si Maranao Consensus Group head Drieza Lininding nga nag- sige na lama’g ilis-ilis sa contractor nga mao untay mopabarog balik sa Marawi City busa hangtud karon wala pa gihapon masugdi ang pag rehabilitar.
Dugtong pa ni Lininding nga halos 10 na ka higayon nga na uktaba ang timeline nga makabalik na ang mga residente sa MAA busa ila ng gihagit si Del Rosario nga moluwat sa pwesto kon uganing mapakyas pa gihapon ang bag-ong saad niini.
