CAGAYAN DE ORO CITY – Nakab-ot daw sa Northern Mindanao Federation of Transport Service Cooperatives ang target nila nga maparalisar ang dagan-trapiko ilabina sa mga publikong sakyanan isip pagduyog sa nationwide holiday kagahapong adlawa.
Kini subay sa aktuwal nga paglibot-suroy ni Luzminda Escobidal,president sa Northern Mindanao Federation of Transport Service Cooperatives nga unang nangulo sa hunong-pamasada sa pipila ka bahin sa dakbayan.
Miingon si Escobidal nga dili lang 30 porsiento apan sobra pa ang nakab-ot nga epekto sa ilang paghunong pamasahero taliwala nga nagtanyag sa libreng sakay ang city ug provincial govts.
Siya miingon nga ang ilang gihimo pagpaabot sa mensahe sa nasudnong gobierno nga dili tiaw ang epekto sa pagsaka sa presyo sa produktong petrolyo sa tibuok nasud.
Una niini,gibutyag ni PRO 10 spokesperson Major Joann Navarro nga mipakatag sila sa sobra libo ka pulis ug force multipliers aron masiguro nga walay sabotahe nga mahitabo sa kalihukan kagahapong adlawa.
Gisaysay ni Navarro nga natapos ang transport strike nga hapsay ug pabiling malinawon.
Siya miingon nga nag-unang tuyo nila ang paghatag sa luwas nga palibot taliwala nga gipatuman sa pipila ka transport groups ang paghunong una sa pagpamasahero.
