CAGAYAN DE ORO CITY – Mag-atubang sa kasong criminal ang drayber sa Bongo truck nga nakaligis-patay sa 73 anyos nga lolo samtang nagtabok sa pedestrian lane sa Zone 2,Brgy Agusan ning syudad.
Kini kon mapakyas pagkonbensir ang kompanya nga gitrabahuan sa trak drayber nga si Jeffrey Cedantes sa pamilya sa biktima nga si Alfredo Rostollias nga iagi sa amicable settlement ang panghitabo.
Gibutyag ni Police Staff Sgt Sean Christopher Bonita,traffic unit investigator sa Puerto Police Station nga patabok ang biktima sa pedestrian lane apan ulahi nang nabantayan ni Cedantes pag-abot sa tunga-tunga nga bahin rason nga naligsan ug naguyod hangtod sa 7 metros nga ginlay-on.
Miingon si Bonita nga nagsubay sa ensaktong lane ang trak apan samtang padulong sa sentrong bahin,hinay-hinay kining mitipas hangtod nga naabtan ang nagtindog nga biktima sa center lane.
Dead on the spot ang biktima nga nakaabot sa city hospital samtang ang drayber ubos una sa kustodiya sa kapolisan samtang gihikay ang tukmang kasong reckless imprudence resulting into homicide.
Hisayrang gikan pa’g Kibawe ang biktima kuyog sa iyang anak ug igo lang nagpa-drop by sa Agusan apan nahitabo ang dugu-ong aksidente.
