CAGAYAN DE ORO CITY, Philippines – Gitug-an ni US President Donald Trump nga may laraw kining manawag pinaagi sa telepono kang Russian President Vladimir Putin.
Tumong niini nga mahupay na ang magtolo ka tuig nga gubat sa Russia ug Ukraine.
Niadtong nangampanya pa si Trump, kanunay niyang litokon nga resolbahon niya ang gubat sa duha ka nasud sulod sa 24 oras lamang.
Sa iyang pinakalab-as nga pakighinabi sa press, subli gipalanog ni Trump ang iyang ambisyon nga mahatagag kahupayan ang maong bahin sa kalibutan pinaagi sa pagmugna sa “ground work” aron mubalik sa negotiating table ang duha ka panig.
Sa umalabot Pebrero 24, subli lab-ason sa Ukraine ang unang adlaw sa pagpangatake sa mga sundalong Ruso ni Putin.
Ang unang pag-atake nahitabo niadtong tuig 2022 gatus ka mga sibilyan ug miyembro sa Ukrainian Troops ang namatay sa Kyiv, Kharkiv, ug Odessa.
