Pormal nang nadawat sa Senate impeachment court ang “answer ad cautelam” o tubag ni Vice President Sara Duterte sa gi-isyu nga writ of summons batok kaniya.
Ang dokumento gipadala pinaagi sa iyang mensahero nga si Arnel Barrientos Jr., gikan sa Fortun, Narvasa, & Salazar Law Firm.
Kini nga law firm maoy manunay sa pagdepensa sa impeachment case sa bise presidente.
Nasubmitar sa kampo ni Duterte ang iyang tubag pasado 5:49 sa hapon, kagahapon.
Ang iyang tubag milangkob sa 35 ka pahina sa dokumento nga nagnaghangyo sa korte nga i-dismiss ang impeachment complaint, kay kini “void ab initio” o walay bili sukad pa sa sinugdanan tungod sa paglapas sa One-Year Bar Rule nga nalatid sa 1987 Constitution.
Ang writ of summons nadawat sa iyang opisina niadtong Hunyo 11, ug gihatagan siya sa “non-extendable” nga napulo ka adlaw aron motubag.
Ang kopya sa iyang tubag ipasa usab sa Senate President, sa impeachment court spokesperson, ug ipakatap sa tanang senador alang sa ilang kasayuran.
