CAGAYAN DE ORO CITY – Gihataga’g katumanan ni Misamis Oriental Governor Juliette Uy ang iyang nasulti nga pakigtagbuan ang Sangguniang Panlalawigan ubos sa liderato ni Vice Gov. Jigjag Pelaez kagahapong adlawa.
Kini alang sa pagkab-ot sa kolaborasyon taliwala sa ilang managlahi nga kagikan sa politika nga gitumong sa pagpangalagad sa katawhan sa lalawigan.
Dumduman nga usa sa mga interbyu sa Bombo Radyo sa special asst to governor nga si Celso ‘Popoy’ Abucejo nga nasampit niini ang tipik sa plano sa gobernadora nga makigkita sila sa bando ni Pelaez aron plansahon ang ilang mga deperensiya aron mapasayon ang pagtunol sa mga batakang serbisyo sa katawhan sa probinsya.
Kini nga pinakaunang panagtagbo ang mitakdo sa gitug-an usab ni Misamis Oriental 2nd District Board Member Dexter Yasay nga nagpadala kanila sa suwat-imbistasyon ang gobernadora alayon sa maong katuyuan.
Sa pila ka pagtambong ug mga kalihukan sa kapitolyo, kanunay nasampit ni Uy ang SP members nga unta anaa mga presensiya sa mga aktibidad aron dayag ipamatuod sa Misamisnons nga sila angayang maghiusa ug ipadaplin una ang kainit sa politika.
Sa maong panagkita, giingong nagkapadayganay sa ilang mga pagbati ang duha ka lideres ug nagpinangayuay sa despensa epekto sa managlahi nga tinubdan sa politika.
Tungod niini,masaligon ang duha ka panig nga sinugdanan kini sa lahutay nga kolobarasyon sa maong mga buhatan sa kapitolyo-probinsyal aron mapaabot ang mga serbisyo nga mas gikinahanglan sa katawhan sa lalawigan.
Kalinya ni Pelaez si kanhi Governor Peter Unabia nga gipildi ni Uy sa subli nila nga panagbugnong-politikanhon sa milabay’ng Mayo 2025.(Photos: MisOr-PGO’s Information Office).
