CAGAYAN DE ORO CITY – Gikuwestiyon ni Cagayan de Oro 1st District Cong. Lordan Suan ang pagdagsa sa libuang mga residente nga tuyo mahimong mga botante sa Brgy Carmen sa syudad sunod eleksyon.
Kini human anaa sa 15-mil ka rehistrante subay sa ilang pagsusi ang napuno ug gustong magsilbing botante sa brgy sukad gisugdan sa Commission on Elections ang voter’s registration niadtong Pebrero ning tuiga.
Miingon si Suan nga kini ang hinungdan nga mihimo sila’g aksyon pinaagi sa pagduso’g 31 ka opposition complaints aron sutaon kon angay kining itugot sa Comelec.
Partikular gikuwestiyon sa kongresista ang 4-mil 338 ka botante nga nagduso’g transfer of registration gikan sa laing mga brgy padulong sa Carmen.
Samtang gi-depensa ni Carmen Punong Brgy Rainer Joaquin ‘Kikang’ Uy ang exodus sa mga botante nga intresado nga mahimong kabahin sa labing dako nga brgy sa dakbayan.
Miingon si Kapitan Kikang nga gisubay lamang sa intresadong mga residente ang sugo sa Comelec ug dunay balaod nga nagtugot kanila.
Namugos usab si Uy nga dili obligasyon sa brgy ang pag-imbestitgar sukwahi sa gipasiatab ni Cong Lordan Suan kay igo lang sila nagserbisyo sa katawhan nga modangop sa konseho sa Carmen.
