Wage increase ug pagpanubag sa mga korap ang panawagan sa grupong Young Free Workers karong umaabot nga Labor Day, sumala ni Norvin Gavino, interim president sa grupo.
Sa iyang interbyu sa Bombo Radyo, siya miingon nga nagpadayon ang ilang hangyo alang sa dugang sweldo tungod sa pagsaka sa presyo sa mga palaliton, bisan pa sa miaging rollback sa presyo sa gasolina.
Butyag niya nga ang sitwasyon sa mga mamumuo nagpamatuod nga dili tungod sa pagtaas sa sweldo mosaka ang presyo sa baligya, kay bisan walay wage increase, misaka gihapon ang adlaw-adlaw nga gastohon sa mga trabahante.
Dugang pa niya, ilang gipasalamatan ang ayuda nga gihatag sa gobyerno, apan dili kini igo nga long-term nga tubag sa kasamtangang kalisod sa mga mamumuo.
Samtang, giingon usab ni Gavino nga kinahanglan adunay manubag sa mga miaging kaso sa korapsyon nga hinayhinay nang nalimtan sa kadaghanan.
Busa, ilang giaghat ang gobyerno nga hatagan og prayoridad ang kahimtang sa mga mamumuo ug ang pagpatuman sa hustisya batok sa mga korap.
